पीएम किसान सन्मान निधीचा २१ वा हप्ता शेतकऱ्यांच्या खात्यात जमा झाल्यानंतर, आता राज्यातील शेतकरी राज्य शासनाच्या ‘नमो शेतकरी महासन्मान निधी योजने’च्या पुढील हप्त्याची आतुरतेने वाट पाहत आहेत. ही योजना केंद्र सरकारच्या पीएम किसान योजनेच्या (वार्षिक ₹६,०००) पूरक म्हणून राबवली जाते, ज्यामध्ये पात्र शेतकऱ्यांना राज्य सरकारकडून दरवर्षी अतिरिक्त ₹६,००० चे मानधन दिले जाते. यामुळे शेतकऱ्याला एकूण वार्षिक ₹१२,००० चा लाभ मिळतो. पीएम किसानचा हप्ता वितरित झाल्यानंतर लगेचच नमो शेतकरी योजनेचा हप्ता वितरित केला जातो.
पीएम किसानचा हप्ता वितरित होण्यास विलंब झाल्यामुळे, नमो शेतकरी योजनेच्या हप्त्याचे वितरणही लांबले आहे. राज्यात सुरू असलेल्या निवडणुकीच्या आचारसंहितेमुळे सध्या या संदर्भातील कुठलाही नवीन अपडेट समोर आलेला नाही. तथापि, पीएम किसान योजनेसाठी पात्र असलेले लाभार्थीच नमो शेतकरी योजनेसाठी पात्र ठरतात.
केंद्र सरकारच्या २१ व्या हप्त्यासाठी राज्यातील एकूण ९० लाख ४१ हजार २४१ शेतकरी पात्र ठरले आहेत आणि याच शेतकऱ्यांच्या खात्यात नमो शेतकरी महासन्मान निधी योजनेचा पुढील हप्ता जमा केला जाईल. या हप्त्याच्या वितरणासाठी राज्य शासनाकडून साधारणपणे १८५० ते १९०० कोटी रुपयांच्या निधीची तरतूद केली जाण्याची शक्यता आहे.
निवडणुकीची आचारसंहिता संपल्यानंतर निधी वितरणासंबंधीचा शासन निर्णय (जीआर) लवकरच जारी होण्याची शक्यता आहे. पुरवणी मागण्यांच्या माध्यमातून या निधीची मागणी पूर्ण केली जाईल आणि त्यानंतर वित्त विभागाकडून निधी वितरणाला मंजुरी मिळू शकते.
नमो शेतकरी योजनेचे बहुतांश लाभार्थी ग्रामीण भागातील असल्यामुळे, स्थानिक स्वराज्य संस्थांच्या (जिल्हा परिषद, पंचायत समिती) निवडणुकांपूर्वी हा हप्ता १००% वितरित होण्याची शक्यता आहे, जेणेकरून ग्रामीण भागातील मतदारांना त्याचा लाभ मिळेल. मात्र, या हप्त्यातून जवळपास २ लाख ४८ हजार ६२ लाभार्थी अपात्र ठरल्याने ते वंचित राहण्याची शक्यता आहे.
